Ale geahča njuolga bierdnabivdái, maŋŋil go son lea biertna goddán son lea ilá fámolaš. Alege mana su lahka golmma beaivvis, jos leat nisu dahje nieida. Bierdnabivddus leat árbevirolaččat leamaš njuolggadusat, maid min mielas lea suddu vajálduhttit.

Jus manná buoragit bivddus de bierdna boahtá biejus ja čuggejuvvo sáittiin. Bivdit lávlot bierdnalávllu, giitime su gii sidjiide lea addán biertna bivdun. Sii málistit das gos bierdna lea goddejuvvon dahje iežá buori sajis gosa sáhttá lávuid cegget. Nissonat maiddái lávlot ahte bivdit leat buresboahtin lávvui sin lusa. Go dievddut bohtet de eai sáhte uvssoha geavahit, galget loavdaga vuolil suotnjat.  

Nisu suoská leaibebárkku ja čolggada dan dievdduid čalmmiide. Maŋŋil dievddut mannet iežá gođiide boradit bierdnabierggu, go eai sáhte leat eamidiid lahkosis golmma beaivvis. Lea maiddái hui dehálaš diktit dávttiid leat ollisin. Daid galgá cohkket ja hávdádit nugo ledje ealli biertnas, vai addá ruovttoluotta eatnamii mii lea šaddadan daid.

Árbevirrui maiddái gullá ahte nissonat čoahkkanit ja báhčet bierdnanáhki vuostá, vai besset oaidnit gean isit bahča boahtte biertna. Son gii deaivá, su isit lea boahtte fales bierdnabivdi.

Sámit leat álo gudnejahttán biertna ja oaivvildan sus lea jierbmi ipmirdit visot maid mii muitalit. Danin ii galgga ila sakka rámohallat dahje vasttit ságastit. Ferte maid geavahit sániid maid son ii ipmir ja gohčodit su juonin iežán. Biertnas lea ovtta olbmo miella ja ovcci olbmo fámut, nugo Johan Turi čállá girjjistis Muitalus sámiid birra.

Čállán: Elin-Anna Labba
Govven: Carl-Johan Utsi