– Min ulbmil lea dahkat sámi musihka bivnnuhin Suomas.
Nu lohká Oula Guttorm, gitárračuojaheaddji SomBys, go Marica Blind riŋgii sutnje gullat gosa lea jávkan. Sámi áidna heavypop-joavku lea leamaš obba oaidnemeahttun maŋemus jagi.

SomBy vuittii Sámi Grand Prix 2009 lávlluin Ii iđit vel. Maŋŋil vuoitima besse gilvvohallat Liet Lávllus, eurohpálaš lávlungilvu unnitloguide. SomBy vuittii gilvvu mii lágiduvvui Frieslándda Ljouwertas, Nederlánddas, seamma čavčča.
Muhto vuoittu maŋŋil ii leat joavku báljo čuojahan. Oula Guttorm, Unna-Maari Pulska ja Juho Kioiniemi leat čađahan soalddátbálvalusa.

– Šattaimet šiitit máŋga giga Suomas, Oula Guttorm lohká.
Su mielas dovdu fas dego álgit ođđasit, danin go eai dieđe jos olbmot leat vajálduhttán sin.

SomBy álge čuojahit sullii vihtta jagi áigi. Musihkkahápmi gohčoduvvo heavypop – seagus popa ja garrarokka gaskkas. Čuojahanmokta boahtá eanemus suoma joavkkuin Nightwish ja HIM. Erenoamážin SomBy-joavkkuin lea ahte joavkkus leat máŋga nieidda geat čuojahit instrumeanttaid.

– Lea cool nieiddain gii čuojaha rumbbuid, lohká Oula, oaivvildeamen Unna-Maari. Eanas teavsttaid čálliba Miira Suomi ja Miilla Pulska. Oula ráhkada eanemus oasi musihkas. Joavku lea geargan ráhkadit ođđa lávlluid váikko leat bargan sierra guovlluin dáid maŋemus jagiid. Dán čavčča ja dálvvi sii leat áigun báddet lávlluid.
Ođđa skearru almmuhuvvo áramusat 2012.

Dán čavčča lea maid vuosttas geardi go joavku orru seamma báikkis. Sii galget lohkat Oulus. Oula Guttorm studere sámegieloahpaheaddjin. Muhtin áiggi orro bieđggusin; Oulus, Guovdageainnus ja Vuohččus. Dál šaddá álkibut hárjehallat, báddet ja mátkkoštit konsearttaide.

– Ovdal lei váttis hárjehallat. Ovtta gaskka dárbbaheimmet njeallje biilla ollet seamma čuojaheapmái. Dál soaitit ovttain birget, muitala Oula.

SomBy lea eanemusat čuojahan Suomas. Go Suomas eai leat galle sámi festivála de  SomBy niegada beassat juogadit iežas ja iežá sámi artisttaid musihka. Vaikko joavkun  lea čužžon lávddis sihke Ruoŧas, Norggas ja Nederlánddas – maŋŋil vuoittu Liet Lávllus de čuojaheimmet vel oktii Nederlánddas – de háliidit čuojahit eanet olgoriikkas.

Oula Guttorm lohká ahte go čuojahit Sámi olggobealde de sis leat álo gávttit konsearttain, ja álo váldet liibba muitalit sámi kultuvrra birra.
– Olgoriikkalaš čuojaheamit leat dehálaččat sámi kultuvrii ja sámi musihkkii, son loahpaha.

Čállán: Marica Blind
Jorgalan: Miliana Baer
Preassagovva